انتبهى امى لتربيتى؟؟؟؟

والصلاة والسلام التامان على خير خلق الله
سيدنا محمد عليه افضل الصللوات واجل السلام

بداية . . .

اتشرف بأن تكونى قارئة لكلمـــاتى المتواضعه هذه
والتى ان قصدت بها
اقصد بها وجه الله تعالى فقط
لعلها تكون بها صدى فى قلوبكن

انتبهى امى لتربيتى؟؟؟؟ Pykgoiae

والله يا بنـــات قلـــبى بيوجعنى اوى لما بشوف بنات زى فى سنى او اكبر منى وفى الضيـــاع خاااالص
يعنى تقريبا الاسم مسلمات فقط
اه والله وللاسف الشديد بيبقوا شايفين نفسهم صح اوووى ونادرا لما بيشوفوا انهم غلط فى حاجة

والله يا بنات الهدف من موضوعى دا
توعيـــة الامهــــات
اللى ليهم 90 % من تربية بناتهم اذا مكنش 100%

امــــى العزيــــزة :

بنتك امانه فى رقبتك هتتحاسبـــى عليهــــا
يعنى اى حاجة بتعملها دلوقتى ليكى نصيب فيها
يعنى يا هتاخدى حسنات يا سيئات

يعنى مثلا لو بنتك ملتزمة وعارفه دينها كويس وبتصلى وتصوم وبتقوم بكل العبادات ..فدا هيرجعلك انتى كمان فى ميزات حسناتك ان شاء الله
لكن تعالى شوفى لو مثلا بنتك مش بتصلى خالص وانتى اصلا معلمتهاش ازاى تصلى
ولبسها غير ملتزم وملفت
وبتخرج بزى غير شرعى وميك اب وكلام من دا
وانتى شيفاها وشايفة اللى بتعمله دا
وساكته تحت مسمى .. خليها تعيش حياتها ..
وقتها كل دا هيبقى فى ميزان سيئاتك

طبعا لا اخلى مسئولية الوالد ..الاب .. نهائيا من ذلك .. ولكن مش موضوعنا دلوقتى دا

رسالة لكل ام :
خلى بالك انت الاصل والاساس
وانتى اللى بتطلعى النشأ اللى المفروض نفتخر بيه سواء بنت او ولد

لكن مهمتك الاكبر فى البنات
لان تربيتك الصح هى اللى بطلع بنات ملتزمات بشرع الله

دلوقتى هقول كلمتين لكل ام بتربى بناتها حاليا .. ولكل واحده هتخلف بنوته قمر ..

حبيبتى فى الله
كونى بقدر المسئولية وتحمل امانة الله

اولا : ربى ابنتك على الاسلام منذ نعومة اظافرها . . .
ثــانيــا: بدل ما نشغل لاطفالنا .. اناشيد طيور الجنة وكراميش وكل دا ... نشغلهم قرآن .. الا بذكر الله تطمئن القلوب
ثــالــثا : بدل ما نقول لا البنت لسه صغيره لازم تبقى زى بنت خالتها وبنت عمتها
لازم تطلع بشعرها وبمينى جيب لغاية ما تدخل ثانوى ابقى احجبها وقتها

اعرفى يا حبيبتى .. ان التعليم فى الصغر كالنقش على الحجر
عمرك لقيتى حاجة منقوشة على حجر او حاجة شديده وقدرتى تمحيها
لا طبعا

فعلشان كدا
علمى بنتك من صغرها الحجاب
مش بقول نقيدها ومن هى صغيره
لكن علميها ودربيها على الحجاب من صغرها
يعنى مثلا قوليلها تعالى اعلمك ازاى تلبسى الطرحه علشان لما نيجى نصلى

رابعـــا : الصـــــــــــــــــلاة
اطفالنا ومن هما عمرهم 3 سنين .. نجيبهم جمبينا واحنا بنصلى ونقولهم صلوا معانا ..
انا عارفة انهم مش هيعرفوا ولا هيقولوا حاجة
بس كفاية انهم يتعلموا من صغرهم ان فى صلاة او حركات بتتعمل علشان ربنا يحبنا

خـــامـــسا : لما عمر الطفل يوصل ل5 سنين .. ابدئى حفظيه القران .. وحده وحده ..
اعرفى ان كل حاجة بتعمليها هتفضل مخزنة معاه لغاية ما ينتهى الاجل

سادســا : البنوتة اول ما تدخل اولى ابتدائى .. علميها الصوم .. متقوليش لسه صغيره حرام طفله ..
لا يا حبيبتى انا مش بقولك صوميها رمضان كله ولا كل يوم
لكن علميها تصوم ..دربيها
يعنى هما الجنود فى الجيش بيدخلوهم الحرب على طول ولا بيدربوهم الاول

ســـابعـــا : علمى طفلتك الحجاب الصح .. الصوم الصح .. الصلاة الصح .. عرفيها ان بدينها هتعلو مكانتها
ولو سابته هتبقى فى الارض ..
** اعرف بنات فى 4 و 5 ابتدائى محجبات حافظات لقرآنهم وصلواتهم ..
اقسم بالله بيصوموا اتنين وخميس
عارفين ليه ؟؟؟
لان مامتهم وباباهم بيصلوا دايما ومحافظين على صلواتهم
وبيصوموا اتنين وخميس
علموهم صح من الاول ..فلقيوا ثمار تعبهم دلوقتى

ثـــامنـــا : اياكى تبعدى عن بنتك فى فترة المراهقه .. دى اهم فترة بتحتاجك فيها كصاحبة وصديقة واخت قبل الام
دى اخطر مرحلة اللى فيها .. هيحصل حاجتين :
يا اما السير على اللى علمتهولها كله الصح
يا اما هتنسى كل دا وهتاخد الطريق الغلط
فاياكى ثم اياكى بانك تبعدى عنها

تـــاسعـــا : راقبى بنتك من وقت للتانى .. اوعى تديها الثقة كامله
علشان متستغلهاش غلط
راقبيها شوفي اصحابها مين وبتتعامل مع مين .. على الموبايل ايه الارقام الموجوده وعلى الانترنت والفيس والياهو بتكلم مين
مش بقول اعملى حصار عليها
بس اعملى فحص دورى كل شوية
زى الطبيب بيعمل فحص دورى كل شوية على مرضاه لحسن يظهر مرض جديد وهو ميعرفش

عاشرا : فترة الجامعه من اخطر اخطر اخطر الفترات
فيها البنت بتتحول من مراهقه لراشده
بتعرف وتتعلم حاجات كتيره .. مهمتك يا امى وقتها ..انك تراقبيها تشوفى تصرفاتها وسلوكها اتغير ولا لا
ومن الاحسن كمان انك تفضلى قريبه منها فى الفترة دى
متقوليش دى كبرت خلاص
لا مهما كبرت لازم تفضل طفلتك المدللة

*نصيحه اخيره : لو لقيتى بنتك ليها ميول وعواطف ظاهره اوى للحب والحبيب .. متعامليهاش وحش وتعاقبيها
بالعكس استغلى دا فى صالحك
بدل ما تسلك طريق وحش
خليها تتخطب لشخص مناسب وكل دا هيبقى فى الحلال وقدام عينك
متقوليش البت لسه صغيره ومش هتتخطب غير لما تخلص
انتى كدا بتضريها
لان ممكن مشاعرها تخليها تسلك سلوك غلط

هقول حكاية اتقالتلى من صاحبة الحكاية :
هى صديقة لى تعرفت عليها فى الجامعه

هقولها على لسانها :
بتقولى :
عـــارفة يابيبا (بتدلعنى انا عرفت شباب كتير وكلمت كتيييير اووووى
من وانا فى اولى اعدادى
مش هنكر انى وقتها كنت بحس انه غلط اللى انا بعمله دا
بس كانوا اصحابى كلهم كدا
كل واحده مصاحبه واحد وبتكلم بدل الواحد اتنين وتلاته
قولت اشمعنا انا
هما مش احسن منى فى حاجة

بصراحة امى كمان كانت مدلعانى اخر دلع
كنت اخرج وقت ما انا عاوزة وارجع فى الوقت اللى انا عوزاه
طلباتى كلها مجابه
الفلوس فى ايدى زى الرز
كنت بلبس احسن لبس وعلى الموضة واستايل

عارفه يا بيبا ... اكتشفت وانا فى ثانوى .. انى مسلمه
اه والله بجد متستغربيش
فى ثانوى امى قالتلى لازم تلبسى الحجاب
انتى كبرتى خلاص
وكنت كارهه اوى الحكاية دى
ورفضت فى الاول
بس بعد كدا لقيت اصحابى لبسوه
فقلت وماله وانا كمان هلبسه
بس لبسه بقى اللى هو الطرحة الصغيره وشعرى نصه باين
وامى مكنتش بتتكلم خالص
ما هو هتتكلم تقول ايه
ما انا فى نظرها لبست طرحه اهو
محدش هيقدر يقولها حاجة

وفضلت على الحال دا
لغاية ما فوقت من قريب ..
بس فوقت بعد ما فقدت كل حاجة
..بالك ميرحش لبعيد ..
انا فقدت معنى انى اكون مسلمة
عشت حياتى كلها زيى زى اى واحده مسلمه اسما بس
عارفه انا دلوقتى بلوم امى لانها سابتنى كدا
سابتنى ومعلمتنيش الصح
معلمتنيش اصلى ولا اصوم ولا التزم بزى شرعى
مقلتليش عيب متحطيش ميك اب ..عيب متلبسيش دا
بالعكس كان كل دا بيعجبها
هتقوليلى فى باباكى .. هقولك كان مشغول بيجمع فى الفلوس علشان يعيشنا حياه كويسة
بس للاسف عشت حياة كويسة وخسرت دينى
بيبا هو ممكن ربنا يسامحنى على كل اللى عملته ؟؟

-- دى كانت حكايتها وانا الحمدلله رديت عليها كويس وعلى سؤالها وربنا يهديها ياااارب

تحبوا تسمعوا حكاية تانى :
هقولكم كمان :
صاحبة الحكاية بتقول :
اتربيت حياتى كلها فى بلد عربى جمبنا هنا
بابا وماما كانوا بيشتغلوا هناك
وانا عشت هناك لغاية 2 ثانوى وجيت على تالته مصر
طبعا جيت قعدت لوحدى مع جدتى
وبابا وماما كانوا لسه هناك
وكان معايا اخواتى الولاد لانى البنت الوحيده
كانوا خنقنى بمعنى الكلمة
تحكمات وقرف
منكرش ان اهلى ربونى كويس
وكنت على طول بعمل عمرة وحجيت كتير
وكنت ملتزمة اوى
بس جيت هنا وحالى اتشقلب
اخدتى حريتى بقى
مع شوية من تحكمات اخواتى الولاد
بس كنت بعرف اتحرك واطلع من وراهم
اترعفت على شاب معايا فى الدرس
وحبنى اوى
ومن وقتها وانا لا اعرف للدين غير اسمى مسلمه وبس
مفيش صلاة ولا صوم ولا عبادات ولا اى حاجة
بعدنى عن الطريق دا
وفى الاخر سبنى اول ما دخلنا الجامعه
كنت تسلية بالنسبه له وبس
بس فعلا انا مش عارفة مين السبب فى الفترة اللى عشتها دى
هل لان بابا وماما مكنوش معايا
ولا انا اللى مقدرتش احافظ على قيمى وانجرفت ورا التيار

الحمدلله على كل حال

هقولكم حكاية اخيره وهخلص والله ..متتعصبوش ..انا عارفة انتوا بتقولوا دلوقتى البت دى رغاية واحنا غلطانين اننا دخلنا موضوعها اصلا

انتبهى امى لتربيتى؟؟؟؟ Smiley-smokingangry

الحكــايه على لسان صاحبتها طبعا :
انا اتربيت وسط اهلى
كنت انا واخويا بس
بنت وولد
ماما دلعتنى اوى من صغرى
وكانت الكلمة كلمتها فى البيت
بابا مهمته يشتغل ويجيب فلوس وخلاص
وهى اللى بتدير البيت كله
كنت انا دلوعة ماما
كل طلباتى مجابة
بابا ملهوش اى سلطة فى البيت
فضلت كدا لغاية ما اتقدملى عريس
وطبعا كنت غير متحملة للمسئولية نهائى
عشت معاه سنتين وجبت بنوته
بس طبعا امى كانت بتدخل فى كل حاجة
كنت علشان انفذله اى طلب
كان يتصل بماما علشان تقنعنى وتقولى اعملى كدا
لغاية اخر مشكلة قالتلى لمى حاجاتك وتعالى
وهو هيجيلك زى الشوز وهيرجعلك ووقتها نقوله طلباتنا وهو اكيد هيوافق
طبعا سمعت كلامها
بس للاسف المره دى كان هو زهق منى ومن تصرفاتى
وبعتلنا ناس انه عاوز يطلق وخلاص مش عاوز يرجعلى تانى
طبعا حاولوا يهدوا المضووع كان هو مصمم على الطلاق
قالى دى واحده مستهتره مش فى بالها غير اللبس والموضة واروح عند ماما
وكان عنده حق
وللاسف انا دلوقتى عديت سن ال40 .. والدتى توفت .. وانا قاعده زى ما انا بشتغل ومصروفى على قدى
وبنتى مع باباها اخدها منى وهى عمرها 5 سنين
لانى غير متحمله للمسئولية ولا اصلح اكون ام
انا دلوقتى بندم على كل حاجة
بندم على انى سمعت كلام امى
وعلى تربية امى الغلط ليا
بس اللى مفرحنى انى بنتى طلعت عكسى والحمدلله اتربت صح
الموضوع دة كلة اخواتى منقول من اخت فى منتدى اخر بس حبيت انقلة ليكم للعلم والفائدة
وللتذكير
لاننا كتير ممكن ننشغل فى حياتنا ومنخدش بالنا من نفسنا واولادنا
فانا بذكر نفسى واياكم بالاهتمام بتربية الاطفال عشان هما اساس حياتنا وهما رسالتنا فى الحياة
فبالله عليكم انتبهوووووووووووووووو

والله عندك حق في كل كلمه قولتيها
مش المثل بيقولك اكفي القدلا على فمها تطلع البنت لامها

الام والاب هم الاساس لتربيه ولادهم وهم القدوه ليهم في كل حاجه

جزاكي الله خير

جزانا واياكى حبيبتى

حمدالله على السلامة نورتى بيتك التانى يا نسمة المنتدى

» عزيزتى الام انتبهى ولا تجبرى ابنك على النوم؟؟؟؟؟